ఇంగ్లండ్‌పై అదరగొట్టి.. తన కలల కారును కొన్న టీమిండియా పేసర్.. ధర తెలిస్తే ఆశ్చర్యపోవాల్సిందే!

టీమిండియా యువ పేసర్ ఆకాశ్ దీప్ తన చిరకాల కలను సాకారం చేసుకున్నాడు. ఇటీవల ఇంగ్లండ్‌తో ముగిసిన టెస్ట్ సిరీస్‌లో బంతితోనే కాకుండా బ్యాట్‌తోనూ అద్భుత ప్రదర్శన చేసి అందరి దృష్టిని ఆకర్షించిన ఆకాశ్ దీప్ తాజాగా తన కలల కారును కొనుగోలు చేశాడు. ఈ సంతోషకరమైన క్షణాలను తన కుటుంబంతో కలిసి జరుపుకొన్నాడు.

 ఆకాశ్ దీప్ సరికొత్త నలుపు రంగు టయోటా ఫార్చ్యూనర్ కారును కొనుగోలు చేశాడు. తన కుటుంబ సభ్యులతో కలిసి కారు ముందు నిల్చున్న ఫోటోను ఇన్‌స్టాగ్రామ్‌లో పంచుకున్నాడు. "కల నెరవేరింది. తాళాలు చేతికొచ్చాయి. నాకెంతో ముఖ్యమైన వాళ్లతో కలిసి" అని ఈ పోస్ట్‌కు క్యాప్షన్ జోడించాడు. ఈ ఫోటో సోషల్ మీడియాలో వేగంగా వైరల్ అయింది. దీనిపై స్పందించిన భారత టీ20 కెప్టెన్ సూర్యకుమార్ యాదవ్ "చాలా చాలా అభినందనలు" అని కామెంట్ చేశాడు. కార్‌దేఖో.కామ్ ప్రకారం ఈ కారు టాప్ మోడల్ ధర సుమారు రూ. 62 లక్షలకు పైగా ఉంటుందని అంచనా.

ఇటీవల ముగిసిన ఇంగ్లండ్ సిరీస్‌లో ఆకాశ్ దీప్ అద్భుత ప్రదర్శన కనబరిచాడు. మొత్తం మూడు మ్యాచ్‌ల్లో 13 వికెట్లు పడగొట్టాడు. ఇందులో ఒకే మ్యాచ్‌లో 10 వికెట్ల ప్రదర్శన కూడా ఉంది. అంతేకాకుండా, ఓవల్ వేదికగా జరిగిన ఐదో టెస్ట్ రెండో ఇన్నింగ్స్‌లో నైట్‌వాచ్‌మన్‌గా బరిలోకి దిగి 12 ఫోర్లతో 66 పరుగులు చేసి అందరినీ ఆశ్చర్యపరిచాడు. ఓపెనర్ యశస్వి జైస్వాల్‌తో కలిసి మూడో వికెట్‌కు 107 పరుగుల కీలక భాగస్వామ్యం నెలకొల్పి జట్టును ఆదుకున్నాడు.